有人話：「新不如舊，始終都是舊的好。」但對小記來說，「貪新忘舊」用我身上就最適合不過。試新係一種享受，尤其是食飯，同人傾偈話題都多！好似用心炮製、極考功夫的意菜正是我杯茶，喜歡佢精緻小巧、顏色繽紛、味道濃淡得宜。今日推介的餐廳剛翻新過，有全新環境之餘，亦有新menu推出，想緊貼飲食潮流，就要快去試喇！
滴溜茄飯紅變白
換上全新裝束的HABITU RISTORANTE THE GARDEN提供時尚意大利特色美食。番茄、芝士、pizza都是意大利菜的signature dishes，在HABITU當然3樣都有。其中推介一道清香鮮茄伴芝士意國飯，顏色白雪雪就令我覺得好出奇：「番茄唔係紅色咩?」高級行政總廚Alex見我咁疑惑，立刻解釋：「我將熟透番茄同海鹽攪成茸，倒落紗布等佢慢慢Drip off番茄汁，滴溜出來的就唔係紅色，而像淺色的白酒，用紗布的原理就係可以令水分同茄紅素分開。」原來造一碟飯都咁講究，食時候真係要嗒真！另一重頭戲波士頓龍蝦伴香草鮮茄意國扁麵，足磅半重的龍蝦絕不欺場，用番茄膏和蒜片來煮非常香口，再加些少Vodka搶一搶火，令醬汁可以Rejuice，龍蝦湯就完全滲入龍蝦肉和扁麵面，單看賣相就已經夠吸引。
翻新Habitu 3合1
HABITU今趟多了Bar的部分，它的名字叫The Alfesco Bar，與露天花園相連，客人可拿酒杯徐徐走到花園，更添悠閒氣氛。雖然它是新成員，但小記反而覺得最鄰近門口的Caffe HABITU更為吸引。它以深木色作主調，右面是老闆親自設計的抽象畫，配以紅黃燈罩的柔和燈光，疏落的座位絕不會令你感覺侷促，名副其實是一個悠閒的Cafe area。中間是HABITU Ristorante，走Fine Dining路線，長方加四方椅感覺比較優雅。提提大家，意大利著名Acosta Valley的客席廚師Antonio Astolifi會於11月1~5日蒞臨HABITU炮製4道菜晚餐，每位$398或每位$588（配3杯美酒），想吃的話記得預早訂位喇！
識飲識食
意國海鮮薄脆
傳統意大利pizza的餅底非常脆薄，這個也不例外，用意大利高筋麵粉製成，有鮮蝦、帶子、三文魚、蟹肉等海鮮材料，入口香脆又不失肉的口感。
香軟意大利芝士餅
市面上一般的Tiramisu有層朱古力粉鋪面，心急食一啖可能會因吸入太多朱古力粉引致不適。但HABITU細心用上法國的朱古力碎，既保持朱古力的濃度，又唔會搞到喉嚨唔舒服。
鵝肝醬伴火箭菜沙律及黑加侖子醬多士
自製鵝肝醬非常香軟，與砵酒、干邑、乾、牛油等攪拌成濃稠狀攤凍後再焗，配以酸酸的黑加侖子醬，滿滿地塗在白麵包上，而你的動作只有一個，就是大吃一口。
Ruby berry tiny $68；
Apple Lavender mojito $68；
3 citrus iced tea $58
醉人顏色令人心動目眩，在夜幕低垂、浪漫的氣氛包圍下呷一口甜酒，盡洗當天的煩惱。
意式雜燴伴芥香果蜜餞
意大利傳統Country style，內有法國黃雞、阿根廷牛、牛腩，最特別是意大利豬手腸，先將豬手起骨，然後攪拌豬手肉、香料、煙肉脂肪再塞回豬手內煨個多小時而成，煙燻味道非常吸引，少心機都做唔到呢！
清香鮮茄伴芝士意國飯
別看這個飯白雪雪，咬落卻有啖啖番茄和芝士香，意國飯加了芝士比較黏口，未必人人食。
原條帝王魚配香檸汁、嫩菠菜及菊芋（1~2位用）
請恕小記孤陋寡聞，一見到條魚就覺得好中國style，仲以為佢上錯菜。經Alex解釋，先至知原來帝王魚來自新西蘭，為了賣相討好才切去魚頭。魚煎得香脆而醬汁帶酸，十分醒胃。
